ایرانی میڈیا کا دعویٰ: امریکا نے گلستان میں اہم ریلوے پل کو کروز میزائل سے نشانہ بنایا

 ایرانی میڈیا نے دعویٰ کیا ہے کہ امریکا نے شمالی ایران کے صوبہ گلستان میں واقع اوگتائے خان ریلوے پل کو کروز میزائل حملے میں نشانہ بنایا ہے۔ یہ پل ایران کو چین، روس اور ترکمانستان سمیت وسطی ایشیائی ممالک سے ریلوے کے ذریعے جوڑنے والی اہم تجارتی گزرگاہوں میں شمار کیا جاتا ہے۔

قطری نشریاتی ادارے الجزیرہ نے فارس نیوز ایجنسی کے حوالے سے رپورٹ کیا ہے کہ یہ حملہ جمعرات کی صبح کیا گیا، جس کے نتیجے میں شمالی ایران کے اس اہم ریلوے کوریڈور کو نقصان پہنچنے کی اطلاعات ہیں۔

رپورٹس کے مطابق اوگتائے خان ریلوے پل ایران کے بین الاقوامی ریل نیٹ ورک کا ایک اہم حصہ ہے اور خطے میں تجارتی سامان کی نقل و حمل کے لیے کلیدی حیثیت رکھتا ہے۔ اگر اس پل کو واقعی نقصان پہنچا ہے تو اس کے علاقائی تجارت اور ٹرانسپورٹ پر اثرات مرتب ہو سکتے ہیں۔

تاہم اس دعوے پر امریکا کی جانب سے تاحال کوئی باضابطہ ردعمل سامنے نہیں آیا۔ اسی طرح حملے سے ہونے والے نقصانات، ریلوے آپریشنز کی صورتحال یا کسی ممکنہ جانی نقصان کی بھی آزاد ذرائع سے تصدیق نہیں ہو سکی۔

دفاعی اور سفارتی ماہرین کا کہنا ہے کہ اس نوعیت کی اطلاعات کی مکمل تصدیق ہونے تک احتیاط سے کام لینا ضروری ہے، کیونکہ ایسے واقعات خطے کی سکیورٹی اور بین الاقوامی تعلقات پر گہرے اثرات مرتب کر سکتے ہیں۔

مزید تفصیلات سامنے آنے پر اس خبر کو اپ ڈیٹ کیا جائے گا۔